自然動物園

互動純度 100%！！

老婆婆收咗錢，一路奸笑咁狂同我哋揮手道別。我踩油往前行，大約再開咗兩、三分鐘，終於嚟到停車場。

一落車，行到一棟建築物前，呢度應該就是動物園入口。

買了兩張票

入口

負責看門口嘅職員，是一位看起來至少八十多歲、隨時行步路都有風嘅老伯伯。佢顫抖咁幫我哋打開個鐵閘放我哋進去。 咦？！一踏進去，「中大伏。jpg」。

所謂嘅「自然動物園」，其實根本就係一個私人大牧場！當我哋一腳踏入去，一秒都未過，一大批極度飢渴嘅綿羊、山羊就好似狗衝 咁向我哋瘋狂衝過來！ 那種熱情程度，直逼一眾高登仔見到女神出 pool。呢度果然是「互動純度 100%」，你想避都無得避。

職員開了閘給我們進去

一大批羊就衝了過來

果然「互動純度100%」

雖然感覺有點骯髒

不過最詭異嘅係，成個動物園，由入口、牧場到停車場，除了我同我老母，由頭到尾一個遊客都無！

成個動物園⋯⋯

竟然又是一個人也沒有

回程嘅山路上，亦都維持住一種《我是傳奇》（I Am Legend）嘅末日死寂。我部 Noah 踩住油開咗極之耐，成條公路靜到好似全人類消亡咗一樣，足足開咗成個字，先至好勉強看見一、兩架車經過。我心諗：「Hi Auntie，我係咪又去咗紅 VAN 嘅世界？」

就只有我一台車

路上也沒有其他車

天氣很好

風景也很美

好不容易逃出生天，驅車嚟到大名鼎鼎嘅 「くじゅう花公園」。

來到呢度我真係職業病發作。呢個「くじゅう」，連佢官方自己嘅宣傳品都無寫漢字，全日文平假名。 上網一查，網絡上啲巴絲打有的翻譯成「久住花公園」，有的又寫作「九重花公園」。

最吊詭嘅係，呢個花公園附近座山叫「久住山」，但隔離條高速公路出口又叫大分自動車道「九重 IC」。到底邊個字先至係正宗？連我呢個阿 Sir 都表示「你問我，我問邊個.jpg」，真係亂過美伊嘅戰線。

到了くじゅう花公園

很多不同的花

因為依家是正夏天，根本唔係開花嘅黃金季節，所以花嘅品種少得可憐。

拍照留念

サルビア（鼠尾草屬的一種植物）

記得 2023 年我曾去過茨城嘅「國營日立海濱公園」，諗住睇花海，結果完美錯過花期，全場只剩下一堆好似綠色毛毛球嘅「掃帚草」（波波草）。謝天謝地，今次九州呢度除了有掃帚草，仲有「サルビア」（一串紅/鼠尾草屬植物）同埋千日紅，總算有些色彩，唔洗行到個人臉青青。

一大片千日紅

千日紅

好像走進了森林一樣

温泉

コキア（地膚）

又名「掃帚草」

到咗中午，我哋行到公園入面一間小餐廳開餐。

間舖看落是由一對好生鬼嘅年輕夫婦打理，個年輕嘅漂亮老闆娘有點似長澤雅美，極度熱情，對住我笑到有種初戀嘅感覺，「A_A」。

我即刻點咗一碗大分名物「とり天蕎麦」（炸雞天婦羅蕎麥麵），我老母則點咗一碗熱辣辣嘅烏冬。

當年輕嘅漂亮老闆娘將兩碗麵送過嚟嘅時候，我望住老闆娘。佢又望住我。

我期待住老闆娘會講：「萌え萌えキュン♡」。

我等咗好耐，佢無做到女僕在為餐點施展魔法時會一邊做出愛心手勢一邊唸出這句台詞，希望把美味與可愛灌注到客人的食物中。

我好失望。（好心你幾廿歲人唔好咁多幻想.jpg)

走進這家餐廳

點了碗とり天蕎麦

又是サルビア

サルビア花畑

離開花公園，我深吸一口氣，因為今日要挑戰這趟旅程駕駛最遠、最攞命嘅終極路程。

我一腳油門，一口氣從大分縣嘅山頭，直接橫跨整個九州，狂飆到佐賀縣嘅「嬉野溫泉」！總行車距離高達 185 公里，我全神貫注變身「頭文字D」，瘋狂揸咗接近兩個半鐘頭先至安全著陸。

科普一下，呢個嬉野溫泉喺日本溫泉界地位極高，與島根縣嘅斐乃上溫泉、栃木縣嘅喜連川溫泉並稱為 「日本三大美肌之湯」。

呢度嘅泉質是神級嘅「碳酸氫鈉泉」，含有超豐富嘅鈉元素。據聞只要浸完，全身嘅皮膚都會變得好似剝殼雞蛋咁滑嫩，極受一眾日本妹同溫泉自戀狂歡迎。除了溫泉屈機，嬉野仲以頂級嘅「嬉野茶」同埋用溫泉水燉煮到入口即化嘅「溫泉豆腐」聞名全日本。

我今晚入住嘅酒店叫 「入船莊」。

當我揸住部大 Noah 嚟到門口一睇，心諗：「話呢度是溫泉旅館？少來了。jpg。」佢外表個設計前衛、摩登到好似安藤忠雄果陣 清水混凝土建築。但神奇嘅係，當我帶老母行進房間入面一看，哇，裡面居然百分百保留咗最傳統、最古色古香嘅榻榻米日式旅館風格！陣反差感真係玩得幾大。

這裡竟然是日式旅館？從外表真的看不出來

但房間又真的是日式旅館

從窗外看出去的景色

這裡竟然有鳥居

到了晚飯時間，我帶老母步行前往喺嬉野溫泉區非常有名的 「宗庵よこ長」 餐廳。

上網睇攻略，班巴絲打都話呢間嘢長期爆滿，門口經常大排長龍等到個人發火。但今日可能神明保佑，「此處應有賀電.gif」，我哋去到竟然完全唔洗排隊，一推門進去就馬上被帶到舒適嘅座位坐低。

難得嚟到，我一臉傲嬌咁點咗最貴、最頂級嘅 「刺身付き特選溫泉湯豆腐定食」。我老母因為不吃生魚片，所以就只點了普通版嘅溫泉湯豆腐定食。

等咗一陣，傳說中用溫泉水熬煮嘅豆腐餐送上嚟。 到底呢個豆腐好唔好食呢？？

哈哈，「劉德華 繼續吹.jpg」。

食落口，其實又唔係特別好食，豆腐雖然滑，但味道其實同普通豆腐差唔多，純粹是賣相比較奇特、幾有綽頭咁解。

有名的宗庵よこ長

我點的「刺身付き特選溫泉湯豆腐定食」

食飽飽散步返酒店，我二話不說脫光光衝落去泡傳說中嘅美肌之湯。暖笠笠嘅溫泉水浸落去，揸咗 185 公里車嘅疲勞同怨氣一瞬間全消。 我一邊摸住自己開始變滑嘅皮膚，一邊心想：「今晚，我終於可以做個滑溜溜嘅精緻巴打喇！」

附近的Joyfull餐廳，同埋下層是停車場

Lawson便利店