到了別府湾SA

從瞭望台看到的風景

喺咁治癒嘅風景面前，我二話不說走去買咗罐 0%酒精嘅 Asahi Super Dry。大啖一灌，凍到入心，徹底解一解車程嘅口渴，爽！ 再開咗幾分鐘車，就去到 「明礬 湯の里溫泉」。

買了Asahi Dry解一解渴

到達明礬 湯の里溫泉

呢度集齊咗參觀、浸溫泉、食嘢同買手信於一身，最特別係可以行入去一間間好似「藍精靈」住嘅草屋裡面，親眼睇到佢哋點樣提取天然溫泉精華「湯之花」嘅神奇過程。

這裡可以參觀、泡湯、吃東西、買手信

了解到如何製作「湯之花」

原本我呢個溫泉狂熱分子好想喺度直接浸返野，點知皇太后喺呢個時候開大絕。
佢眉頭一皺，一臉嫌棄咁話：「每次浸溫泉之前都要洗頭沖身，好麻煩呀！而家唔想浸！」
我心諗：「Hi Auntie，i人情商大考驗又嚟喇。」 唯有吞咗呢口氣，順從皇太后嘅旨意。
臨離開前，我買咗兩杯好出名嘅溫泉蒸布丁，一啖一陣濃郁嘅蛋香與焦糖苦甜，總算撫平咗少少受傷嘅心靈。

看到了，又想喝

買了兩杯溫泉蒸布丁

跟住，我哋驅車直奔全大分縣最「邪惡」嘅景點 —— 「別府地獄巡遊」（別府地獄めぐり）。

雖然名號叫「地獄」，聽落好似要去恐怖密室咁，但其實呢度係九州數一數二最受歡迎嘅自然奇觀。大自然用熱氣同礦物質，喺度創造咗七個獨具個性、色彩斑斕嘅溫泉，絕對是「神級存在」。 泊好部 Noah 之後，我哋先去「海地獄」。喺門口售票處，我好豪氣咁一口氣買咗「別府地獄巡遊共通券」（即係七個地獄嘅全包聯票），順手攞咗張地圖同埋一本蓋章本，準備大玩特玩。

買了兩張別府地獄巡遊票

另外也拿了一張地圖和記念蓋章本

一踏入 「海地獄」，發現呢度根本一點都唔恐怖，反而成個環境依山傍水，根本就是一個精緻嘅日式家庭庭園。 佢最招牌嘅景色，就是那一汪呈現如夢幻大海般、鈷藍色（Cobalt Blue）嘅高溫溫泉。在源源不絕嘅白煙霧氣之中，美到好似人間仙境。

進入海地獄前的地方

海地獄

庭園入面仲設有一個足湯，我看見成排遊客一齊喺度「排排坐、浸腳腳」，非常壯觀。

美麗神秘的鈷藍色池水，讓人難以想像身處地獄

另外還有一個地方可以泡腳

離開海地獄，行多兩步就去到隔離嘅 「鬼石坊主地獄」。

鬼石坊主地獄入口

到達鬼石坊主地獄

呢度嘅景觀就神奇喇。地面是一大片沸騰緊嘅灰色滾燙泥漿。當啲蒸氣不停湧上嚟嘅時候，泥漿會吹起一個個圓形嘅大氣泡，形狀像極了一個個光頭和尚。所以日文名字就用咗 “ぼうず”（坊主，即係和尚） 嚟命名，非常有畫面感。

呢度仲有一個叫「鬼之高鼾」嘅噴泉，高壓蒸氣「呼呼」聲咁從地底噴湧而出，陣轟鳴聲低沉沉咁，真係好似惡魔喺度打鼻鼾一樣，震懾靈魂。 參觀完鬼石坊主地獄行返去停車場附近，突然看見路邊豎立咗個告示板。

我發揮研究精神走上前一睇，原來係介紹中國近代文豪郭沫若當年都曾經嚟過呢度「遊地獄」，仲一時興起喺度作咗首詩，真係估佢唔到。

緊接住行去 「灶地獄」（かまど地獄）。

沸騰的灰色熱泥漿湧出的球狀氣泡像極了和尚的腦袋

原來郭沫若也曾經到過這裡，還作了一首詩

一入到去，唔知發生乜嘢事，現場竟然聚集咗大批韓國旅行團！我目測現場絕對超過 100 個泡菜國遊客。班韓國導遊手持大聲公，用極度高分貝嘅韓文瘋狂轟炸。原本好端端一個寧靜禪意嘅景點，一瞬間變咗做星期六朝早嘅元朗大橋街市，嘈到耳膜穿。

呢個灶地獄最好玩嘅地方，是佢嘅溫泉水會隨住氣溫同氣候轉變顏色。入面既有橙色、藍色嘅水池，亦有滾燙嘅熔泥，視覺效果極之豐富。

睇完灶地獄，行去對面嘅 「鬼山地獄」。

灶地獄

會隨氣溫及氣候轉變顏色的地獄

呢個地獄又有另一個霸氣嘅稱呼叫 「鱷魚地獄」。因為呢度利用咗溫泉源源不絕嘅熱能，打造咗全日本第一個成功飼養鱷魚嘅設施。一走進去，竟然有大約 70 隻凶猛嘅鱷魚 密密麻麻咁喺溫泉水入面游下游下、或者喺岸邊曬太陽，陣「動物園」嘅野性風直撲而來，非常屈機。

鬼山地獄

又稱「鱷魚地獄」

隻惡鬼好Cute

是日本第一個利用溫泉熱度來飼養鱷魚的地方

行完鬼山地獄，皇太后摸一摸個肚，眼神再度發綠，表示又到開餐時間。

走到附近打算吃午飯

原本打算到這間地獄蒸工房 鐵輪，卻要等很久

原本我打算帶佢去最有人氣嘅「地獄蒸工房 鐵輪」，點知行到門口一睇個告示板：「現時輪候時間：1.5小時」。 我當場心諗：「Hi Auntie！食餐飯要等一個半鐘？真係遲啲都變餓鬼。」

果斷放棄！我即刻拎出電話打開 Google Map 用雷達搜尋，發現附近有一間無咁多人知嘅地獄蒸餐廳 —— 「地熱觀光蒸煮 緣間」。

去到門口，發現果然完全唔洗等位。一踏進去不見有侍應招待，我就直接走入室內。裡面的職員見到我一頭霧水，就指一指收銀處，原來呢度要先買飛點菜。由於菜單全日文，我便一字一句開起個「人肉翻譯機」將啲菜式逐一解釋俾我老母聽。

就在呢個時候，神蹟出現了。

附近這間「地熱觀光蒸煮 緣間」就不用等位

還可以一面吃，一面泡腳

收銀處嗰位後生嘅日本女侍應有啲似 江旻憓，聽見我口中吐出流利嘅廣東話，對眼即刻亮咗。

然後，佢竟然直接用正宗、無花無假嘅廣東話同我地對答、點菜！

我當時震驚到「呆咗。jpg」。

喺大分別府呢種連高登仔都未必識去嘅日本大鄉下地方，竟然會喺一間地道嘅地獄蒸餐廳入面，撞到一個講廣東話嘅香港（或澳門）女仔喺度打工！呢種異國遇同鄉嘅魔幻感，震撼程度直逼喺茶餐廳撞到荷里活巨星搭枱，簡直係緣分嘅最高境界！

(後記：等我旅行完返到香港上網睇新聞，先至知道當年個「美心妹妹」楊鎧凝（Celine），原來依家都喺大分縣嘅宇佐市柳ヶ浦留學。需知道，柳ヶ浦比起別府，直頭是鄉下入面的鄉下！看來大分縣隨時隱藏住好多香港人嘅勢力)

點好菜，我地搵咗個位坐低。一坐落去，發現呢個位置設計得極度「屈機」—— 枱底居然是一個足湯！你可以一邊將雙腳浸喺暖笠笠嘅溫泉水入面，一邊喺上面開餐，簡直是神級享受！

呢度主打嘅「地獄蒸」，就是利用高達攝氏 98 度嘅天然溫泉蒸氣，將啲新鮮食材直接蒸熟。

到底用溫泉蒸係咪真係更有益身體？定純粹是騙遊客嘅噱頭嘢？老實講，我真係唔知。

但如果你問我，今餐點嘅蒸海鮮、蒸肉類同埋在地野菜好唔好食？ 哈哈，「少來這套.jpg」。

成餐飯因為是由頭到尾直接用原始蒸氣蒸熟，中間完全無落任何調味！什麼鹽、豉油通通都無！ 食落口，你話係咪真係滿載食材原汁原味嘅鮮美？我又真係完全食唔出。一邊食，我心裡面一邊默默流下一滴眼淚：「Hi Auntie，呢餐好似又交咗少少智商稅⋯⋯」 不過見在個足湯咁舒服、老母又食得幾新奇嘅份上，算數啦！

利用攝氏98度的天然溫泉蒸氣來蒸

我點的蒸海鮮、肉類與在地蔬菜

食飽飽之後，我哋行去附近鐵輪溫泉區嘅最後一個地獄 —— 「白池地獄」。

同剛才喧鬧嘅灶地獄截然不同，呢度氣氛唯美、沉靜。成個精緻嘅日式家庭庭園散發住一種極其平靜、近乎禪修嘅氛圍。最特別嘅是，園內還利用溫泉嘅熱能，打造咗一個「熱帶魚館」，裡面養咗好多巨型嘅亞馬遜熱帶魚，喺古風庭園入面睇食人魚，陣反差感都幾有魔幻寫實主義嘅味道。

至此，鐵輪溫泉區嘅五個地獄全數解鎖！

白池地獄

白池地獄，氣氛唯美沉靜

設置了鐵輪蒸氣浴溫泉的一遍上人

這座日式庭園以其最為平靜的氛圍而聞名

最特別嘅是，園內還利用溫泉嘅熱能，打造咗一個「熱帶魚館」，裡面養咗好多巨型嘅亞馬遜熱帶魚，喺古風庭園入面睇食人魚，陣反差感都幾有魔幻寫實主義嘅味道。 至此，鐵輪溫泉區嘅五個地獄全數解鎖！

園內還設有利用溫泉熱的「熱帶魚館」

亞馬遜真唇脂鯉

鬼山地獄

血池地獄

剩下最後兩個地獄位於「柴石溫泉區」，兩邊距離大約 3 公里。我帶老母走回停車場，發動我部免費升級嘅 Noah，踩油開咗大約 10 分鐘車程趕過去。

嚟到第六站 —— 「血池地獄」（血の池地獄）。

呢度名副其實，地底湧出來嘅熱泥含有極高濃度嘅氧化鐵同氧化鎂。成個巨大嘅溫泉池呈現出一種驚心動魄、宛如鮮血般嘅朱紅色。當我同老母行上觀景台向下眺望，咁啱今日天晴，烈日照射落去，嗰陣鮮紅與藍天形成強烈對比，影相打卡簡直「視覺衝擊。jpg」，非常震撼。

熱泥中含有大量的氧化鐵、氧化鎂和其他物質

鮮紅的顏色宛如血水池一般

離開血池地獄，隔離就是最後一站 —— 「龍卷地獄」。

呢度是一個舉世聞名嘅「間歇泉」。地底深處高達 150°C 嘅熱水同高壓蒸氣，會定期像火山爆發咁衝破地面狂噴。佢大約每隔 30 至 40 分鐘就會噴發一次，每次持續噴射 6 至 10 分鐘，水柱直衝半空，氣勢磅礴。

到達龍卷地獄

入口

睇埋呢個噴泉，我本蓋章本終於「大功告成」，集齊晒七個地獄嘅神聖蓋章！（聽講加10蚊可以換一本名為《如來神掌》的失傳武功秘笈）

龍卷地獄是間歇泉之一

終於收集好全部記念蓋章

朝聖完地獄，我哋繼續開車前往下一個神秘景點 —— 「八幡竈門神社」。 如果係動漫迷，一聽呢個名一定會即刻「激動到留名」，因為呢度就是神作《鬼滅之刃》傳說中嘅超級聖地！

神社同《鬼滅》之間最直接嘅歷史連結，就是主角嘅姓氏。主角「竃門炭治郎」同「竃門禰豆子」嘅那個極罕見姓氏 「竈門」，正正就是這座擁有過千年歷史嘅神社名字！

八幡竈門神社

主殿

加上《鬼滅》作者吾峠呼世晴本身就是九州人。前兩天我哋已經拜訪過了位於太宰府嘅「寶滿宮竈門神社」，今日再下一城，踩入大分別府嘅「八幡竈門神社」。合理推測，作者當年創作這套風靡全球嘅動漫時，大部份靈感根本就是取材自佢嘅故鄉九州！

這座八幡竈門神社有超過一千年歷史，境內流傳住許多神秘神話。其中一個最著名嘅傳說，聽完直頭覺得作者是有抄考：

「傳說很久以前，當地的村落出現咗一隻兇殘嘅食人鬼，經常生吞村民。村民頂唔順，唯有向神靈祈禱。神靈於是現身同隻食人鬼大玩一場賭博比賽，神靈話：『如果你能夠在短短一夜之間，喺神社門前建好 100 階石階，我就每晚送一個活人俾你做祭品；但如果你起唔到，我就將你掉進竈爐裡面煮熟食咗你！』

食人鬼為咗食人，全晚發瘋咁搬石起樓。眼看佢就快挑戰成功，點知當佢啱啱起好第 99 階石階嘅時候，天邊突然傳來一聲雞鳴，太陽升起！食人鬼嚇到魂飛魄散，倉皇逃跑之際，慌亂中喺現場留低咗一隻石鞋。

雖然食人鬼挑戰失敗，但神靈覺得佢肯一夜搬 99 塊巨石，呢份熱血同努力值得表揚（respect.jpg）。於是派咗一條龍神去感化佢。結果，呢隻食人鬼大徹大悟，竟然留低咗成為咗『竈門地獄』嘅守門人，直到今日都好認真咁喺度返工！而龍神就留守喺度看管住佢，確保佢唔會再發神經。

另一方面，當年驚魂未定嘅村民鼓起勇氣，嘗試將自己隻腳放進食人鬼留低嘅巨大石鞋裡面。點知一踩進去，身體突然湧出一股神秘嘅力量！不單止返工精力無窮、效率倍增，連多年嘅風濕痛、宿疾都即刻不藥而癒！」

大分足球隊也來參拜

傳說鬼滅之刃主角「竈門」姓氏發想源自於此

我同老母行到拜殿（祭祀大廳），一抬頭，果然看見天花板上畫住一幅氣勢磅礴嘅龍神畫作。據聞這條就是當年去感化惡鬼嘅龍神。大批《鬼滅》動漫粉一致認為，這條龍神嘅神態，同炭治郎使出水之呼吸十之型「生生流轉」時湧現嘅那條巨龍，有異曲同工之妙！

拜殿天花板繪有巨大的水龍神畫作

神似劇中的「水的呼吸」招式

現場看過去，掛繪馬嘅地方掛滿咗來自日本全國各地粉絲嘅心願，重點是，大家都在繪馬上面親筆畫咗精美到直逼原畫師嘅炭治郎、禰豆子同炎柱嘅插畫。成間古老神社多咗一份動漫同人祭嘅氣氛，非常值得一看。

繪馬有很多都有畫鬼滅之刃的主角

這幅畫畫得超似打印

 

 

相傳夜間肆虐的惡鬼與八幡神打賭，若能在一夜之間建好99階石階就放過村民

但鬼在做到第99階時因天亮而逃跑，留下未完成的石階與鬼留下的石草鞋印

玩到黃昏，我開車返別府市中心今晚入住嘅酒店。

呢間酒店地理位置極佳，就正正位於地標「別府塔」對面。我一來到，就先將架大 Noah 停喺酒店門口嘅空地，然後大搖大擺行入去大堂櫃枱 Check In。辦手續時，我用日文順口問個職員：「請問我部車今晚可以就咁停喺門口個位嗎？」

個職員一臉尷尬咁笑著答我：「不好意思啊，我們門口不能停隔夜車。我們酒店嘅專用停車場，其實是位於對面、別府塔旁邊那個停車場，請你依家開過去那邊停泊。」

我內心瞬間：「Hi Auntie，又玩我。」

別府塔就在我入住的酒店對面

我入住的酒店

唯有認命，走返出去開動部車，在別府繁忙嘅街道上兜咗一個大圈，好不容易才將部 Noah 塞進別府塔旁嘅車位。再拉住老母橫過馬路，重新返去酒店辦好入住手續。

酒店大堂感覺很豪華

還提供免費咖啡

入到房放低行李，我睇一睇前幾天累積落嚟嘅臭衫。身為一個愛乾淨嘅i人，我決定提起大包換洗衣物，走到酒店附近嘅 24 小時自助洗衣店（Coin Laundry）。

一邊等部洗衣機「旋轉、跳躍、我閉著眼」，一邊喺度刷電話。

酒店附近的洗衣店

在這裡洗一洗這幾天的衣服

 

 

搞定晒啲衣服，大約七點鐘，我同老母散步去 JR 別府車站入面嘅 「豊後茶屋」 餐廳食晚飯。

 

 

別府站

站前也有一個溫泉

今晚我點咗呢度最招牌、最能體現大分縣風味嘅 「豊後満喫定食」。

套餐一送上嚟，極度豐富：入面有炸到金黃酥脆嘅雞肉天婦羅（とり天）、一兜熱辣辣、配料極多嘅大分名物「團子汁」（だんご汁）、仲有一盤好有特色嘅八瀨麵餅。

豊後茶屋餐廳

我點了這裡的特式料理「豊後満喫定食」

 

老母咬了一口炸雞天婦羅，嗯，皮脆肉嫩，這頓地道大分菜總算成功俘虜咗皇太后嘅胃袋，安全過關！

 

とり天是雞肉天婦羅、だんご汁（團子汁）、やせうま八瀨麵餅

這個豊後満喫定食就有齊以上大分縣的特式美食

又見Sienta的士

睇錯，以為係「乃野」

我喜歡這種建築，下方就直接是停車場

在香港應該沒可能地舖就拿來做停車位

 

食飽飽，兩母子喺別府嘅街頭散步返酒店。

中途經過一間開到燈火通明、音樂轟炸嘅波子機店（Pachinko）。我出於好奇向玻璃窗裡面一望 —— 震懾靈魂嘅一幕發生了。

整間巨大嘅波子機店裡面，一排排坐喺度瘋狂打珠仔嘅玩家⋯⋯竟然清一色全部都是白髮蒼蒼、行步路都震吓震吓嘅老人家！

那一瞬間，我好似看透了這個溫泉鄉嘅終極秘密。

 

波子機店內全是老人家﹗

晚上的別府塔真漂亮

別府呢個大鄉下，入夜後完全無乜嘢「夜繽紛」可言，又無「廟街大媽歌舞團」同 Happy 伯喺度瘋狂跳舞，更加無大媽集體跳廣場舞。

別府嘅夜晚寂靜到可怕。這班精力旺盛、夜晚無處消遣嘅日本銀髮族，唯有集體踩入波子機店，一邊聽住震耳欲聾嘅機械聲，一邊瘋狂打珠仔，自製佢哋嘅「別府夜繽紛」。

望住呢班打波子機打到直逼電競選手般專注嘅老爺老奶奶，我不禁心頭一震，長嘆一聲：「呢度嘅老人家⋯⋯真係老當益壯。jpg！」

 

下一頁 / Next Page