2026年9月9日星期三

進擊的巨人故鄉

第三日朝早7點左右，我同老母準時移步到酒店大堂側邊嘅餐廳開餐，食飽執拾好。

酒店大堂

可以拿的食物也很豐富

10點鐘正式踩油出發，開咗大約一個鐘頭車程，就嚟到今日第一個景點 —— 「耶馬溪・青之洞門」。講起呢度嘅歷史，真係不得不出個貼圖叫「respect.jpg」。

喺1730年嗰陣，有個叫禪海嘅和尚嚟到呢度參拜。佢發現沿住山國川嘅參拜路線全部都係懸崖峭壁，行錯一步就直接去見佛祖，非常危險。出於大慈大悲之心，佢喺1735年左右攞到官方許可同資助之後，竟然僅憑住一錘一鑿，親手同一點一滴雇用石匠，喺硬梆梆嘅岩壁上開鑿隧道！

到達耶馬溪

河川公園內的禪海之像

呢一鑿，就鑿咗足足三十多年，直到1764年先至大功告成。呢個神級事蹟後來仲被日本大作家菊池寬寫進小說《恩讐的彼方》入面，令禪海和尚同青之洞門成為咗呢度最具代表性嘅歷史景點。

青の洞門

我摸住行車隧道入面啲凹凸不平嘅岩壁，心諗如果換作係現代高登仔，鑿咗三日可能已經上網發帖：「[FF] 獨自一錘一鑿開山路，有冇巴打入嚟留名集氣？」禪海和尚可以堅持三十年，真係非同小可。

青の洞門

耶馬溪,競秀峰

這個年代還有100円的飲品﹗

離開青之洞門，再開咗大約一個鐘車，我哋嚟到日田町嘅「やな場茶屋」。

やな場茶屋

從茶屋望出去

呢間茶屋非常之大牌，係一間只喺夏天同秋天期間限定營業嘅人氣香魚（鮎魚）專門餐廳。

我哋點咗招牌嘅「鮎定食」（鹽烤香魚套餐），無幾耐就熱辣辣送上嚟。

茶屋內

呢度嘅烤魚完全保留咗最地道、最野外求生嘅經典做法：職員會先喺魚鰭同魚尾抹上大量嘅鹽，然後直接成條魚用竹籤串起，放進炭火慢烤。重點嚟喇 —— 佢哋係完全唔劏魚嘅！即係無將魚嘅內臟拎出嚟！成條魚烤好之後直接咬落去，魚肉會帶有一種好與眾不同嘅甘苦味。因為香魚平時係食矽藻為生，佢嘅內臟喺日本人眼中簡直係精華入面嘅精華，呢種苦澀，就係傳說中「成熟嘅甘苦感」。而且因為魚肚無被劃開，水分同魚油被牢牢鎖喺裡面，形成咗類似「蒸烤」嘅極致效果，肉質滑嫩多汁到直逼神級！最正嘅係，餐廳外面就是三隈川。佢哋喺河中心利用竹同木搭建成斜架（魚梁），順住水流自然捕捉游落嚟嘅香魚，真真正正嘅「即捕即燒」，風味無得頂。

我點的定食

就是這個機關捉到的鮎（あゆ）

食飽之後，我同老母行去對面公園附近嘅「若宮神社」散步。

呢度完全一個遊客都無，成個神社寧靜到好似時間停止一樣，極之舒服。

附近的若宮神社

完全沒有遊客的若宮神社

散完步，我再次發動部 Noah 開往「大山水壩」。

普通人去旅行邊有人會專程去睇水壩？「少年你太年輕了。」

我去呢度，完全是為了解鎖動漫迷嘅終極聖地！因為喺大山水壩嘅下游廣場，設置咗《進擊的巨人》主角艾連、米卡莎、阿爾敏童年時期嘅銅像！當你企喺呢三個童年銅像嘅背後，一齊仰望眼前巨大嘅水壩壁，那一瞬間嘅壓迫感同氣勢，簡直完美還原咗漫畫第一話入面「人類回想起被巨人支配的恐懼」！

事實上，《進擊的巨人》作者諫山創本身就是出身於呢個日田市。說不定，佢當年就是日日望住這個大山水壩，才創作出「瑪利亞之牆」這套神作！除了水壩，日田市周邊仲有好多巨人聖地，例如 JR 日田車站南廣場有調查兵團「里維兵長」嘅銅像，而道之驛「水邊之鄉大山」入面仲展示緊作者嘅真跡手稿同童年畫作，動漫迷嚟到實會瘋狂。

不過呢個大山水壩距離日田市中心都幾遠，大約有 10 公里，揸車都要 20 分鐘。

喺現場，我見到幾個西方歐美面孔嘅「巨人粉」，佢哋竟然是專程在市區搭的士過嚟，仲要叫個的士司機喺現場等埋佢哋回程！

我心裡面默默幫佢哋計一計數：我依家租一日 Noah 都只是 200 多港元。但如果由 JR 日田車站搭的士去大山水壩，單程估計就要 4,000 至 5,000 日圓，來回即是 10,000 日圓！走一轉就要大約 500 港元！車費貴過我租一日車雙倍有多！見到佢哋，我頓時覺得自己自駕遊嘅決策真係「智商在線、屈機到震。jpg」。