媽媽坐在窗邊位

沒有電視看，唯有看空姐

至於我呢？臨上機之前，我特登走去買咗杯咖啡，諗住「自製熱血」，提一提神準備喺機上溫習下九州地圖。

結果？「理想很豐滿，現實很骨感。」 杯咖啡完全發揮唔到作用。

架飛機連油門都未踩、甚至未起飛，我成個人已經進入咗深度睡眠狀態，仲喺機艙裡面打起火山爆發級數嘅鼻鼾。 隔離左右嘅乘客應該好想直接將我打包放落行李艙。

一直到架飛機「呯」一聲震動、個輪落地降落嗰一刻，我才好似被驚醒嘅喪屍咁彈返起身。 一覺瞓醒，不知不覺間，3個小時左右嘅機程就完美結束。

我揉一揉對眼望向窗口，好啦，九州福岡，我地終於到喇！

下晝3點左右，機輪落地，正式踩入日本九州福岡國際機場。

入海關之前，我一早好醒目咁喺部自辦手續機度「咇」好晒嘢，諗住一陣行去入境櫃枱可以幫班職員慳返啲通關時間。點知一走到櫃枱前，同老母雙雙企定，喺我呢個角度，啱啱好一望就望到入境職員部電腦螢幕。

突然之間，畫面彈出個大字。 「黑名單」 ？。我一睇，當場嚇到心跳漏咗半拍！

當時我心諗：「Hi Auntie，唔係一落地就要遣返呀？仲要帶埋老母，今次真係柒出國際、柒到留名。」 我對眼定咗喺度，「安心上路、一路好走.gif」嘅畫面在我腦海之中出現。

好在，個入境職員面不改色，完全無問我任何嘢，直接「擦」一聲，喺我本護照內頁貼咗張方形嘅「上陸許可（Landing Permission）」貼紙。呼，虛驚一場，「好人一生平安.jpg」。

踏出海關，發現福岡國際機場嘅入境大堂細細地，無想像中咁宏偉。聽講喺度直接搭的士去市區平到笑，一於廢事同人迫地鐵，拉埋老母直奔的士站。

來到福岡了

Premium Taxi 竟然是 Sienta！

上到車，的士阿叔幫我地將啲行李塞好入車尾箱之後，突然間好似見到鬼咁，急急腳衝回駕駛席，「啪」一聲波口，一腳油門就將架的士開走！

我當時連目的地都未講，阿叔一邊踩油一邊好緊張咁話：「離開咗呢度再講！離開咗先！」睇落佢係極度驚妨礙到後面啲車，呢種效率，直逼香港紅的喺紅隧口搶客。

等架的士駛離咗有機場禁區範圍，阿叔先至放鬆落嚟，施施然問我想去邊。 我：「APA Hotel 博多站筑紫口。」 阿叔抓晒頭，諗咗兩秒：「嗰邊有三間APA Hotel喎，邊間呀？」 我好神氣咁補多句：「酒店一樓有一間『華味鳥』餐廳嘅。」

阿叔聽完即刻「A_A」咁嘅樣，表示完全明白，車速隨即加快。

由機場去酒店，車程真係快到你唔信，大約十分鐘就到咗。2.5公里嘅路程，短到有啲荒謬。

如果用香港嚟做比喻，就好似你喺赤鱲角機場巴士總站上車，架車開到去國泰城——無錯，只係去到國泰城咋！你連赤鱲角都未離開，更加唔好話去到東涌。 我長咁大個仔，從未想像過一個國際機場可以同市區近到咁「屈機」。

我地入住嘅「APA Hotel 博多站筑紫口」，呢個名一聽就令我呢個日語老師職業病發作，諗起「九州」喺古代其實就係叫做「筑紫島」（つくしのしま）。而博多，不單止係福岡市嘅心臟，直頭可以話係成個九州最繁華、最多衰嘢玩嘅地方。

講起博多車站，呢度作為九州最大嘅鐵路總站，有火車、有新幹線、有地鐵，仲要同機場只有10分鐘車程，功能完備到直逼「全功能套房」，簡直係配套界嘅神級存在。

順帶科普一下，大家熟知嘅「APA Hotel」集團，喺2025年已經正式超越咗東橫Inn，全日本開咗大約1200間分店（接近13萬5000個房間），無懸念成為日本第一大酒店集團。

我坐這種傳統的舊的士就好了

來到了博多APA HOTEL

今次我好豪氣咁訂咗兩間房。無他，我深知自己嘅鼻鼾聲破壞力驚人，達至「震懾靈魂」嘅境界。 為免老母半夜頂唔順要「用武器物理超渡兒子」，每晚分房訓係基本嘅孝道。

放低行李，喺房度「 dummy」左一陣，就帶老母落去博多車站附近行吓，再慢慢散步去中洲。

房間不算大

洗手間乾淨就好了

博多車站前街道

博多車站

對機迷嚟講，中洲絕對唔陌生。喺《人中之龍5》入面，呢度被改名做「永洲街」，亦即係桐生大叔隱姓埋名做的士司機、得閒去夜總會洗錢嘅地方。現實中嘅中洲亦一模一樣，五光十色，成街都係夜店、居酒屋、K房，同東京歌舞伎町、札幌薄野並列為「日本三大歡樂街」，簡稱「男人天堂」。

沿河兩岸入夜後會擺滿傳統嘅「中洲屋台」（即係日式路邊攤），最能體現九州嘅地道文化。可惜我地行到去嘅時候先至下晝五點半，啲阿叔仲起緊波口準備緊。

到達中洲

中洲

那珂川沿岸的中洲的屋台街

中洲的屋台街

呢個時候，真正嘅災難黎喇。老母由朝早食完早餐之後就一直「絕食」到而家，成個人餓到對眼發綠，直逼喪屍。行到去附近的博多運河城（Canal City）時，佢已經快要餓暈，求其指住一間拉麵店就話要衝進去。結果？「水魚。jpg」。嗰間嘢貴到開巷都不不在話下，份量仲要少到好似餵貓咁，兩啖就無晒。

最後到了這間店吃拉麵

份量非常少

老母食完表示完全「未飽」，要搵第二間「續單」。行多兩步，佢竟然又再揀食拉麵！（到底對拉麵有幾大執念？）

好在博多運河城5樓有個「拉麵競技場」，一次過集結咗8間豚骨、雞白湯、醬油同味噌嘅名店。老母第二輪揀咗一間叫「麺や豚夢」嘅。謝天謝地，呢次份量夠晒大件夾抵食，終於成功將老母「餵飽」，免除了一場家庭危機。

又到了拉麵競技場

最後選了這間 麺や豚夢

份量夠多，今次夠飽了

這輛警車竟然是Solio！

餵飽咗「皇太后」，再陪佢行咗一陣博多運河城，我地就慢慢散步返酒店。

行喺福岡嘅條街度，我呢個i人一邊行一邊觀察。不得不說，九州人嘅衣著打扮，相比起東京嗰邊，真係顯得有少少老土，陣「鄉村風」吹得幾勁。不過！上天係公平嘅，雖然件衫老土，但喺條街度隨便望下，遇見嘅女仔普遍都質素極高，非常養眼。

其實諗返起又好合理。被譽為「千年一遇美少女」嘅橋本環奈、今田美櫻、仲有經典嘅酒井法子、松田聖子、蒼井優、田中麗奈、YUI、甚至歌姬濱崎步，全部個底都係九州人！

講起中洲呢個歡樂街，我又突然諗起一個叫「浜野はるき」嘅女仔。佢係一個來自福岡嘅創作歌手，經歷相當傳奇，做過Model、做過Idol、甚至做過日本職籃球隊嘅跳舞女郎。最正嘅係，佢仲喺中洲做過高級陪酒小姐（キャバ嬢），之後仲上過戀愛真人騷。

我個人好鍾意佢一首幾熱門嘅歌叫《ギジコイ》（疑似戀愛），啲歌詞露骨到引人犯罪；而佢另一首《中洲ロンリーナイト》（中洲寂寞之夜），就正正寫盡佢當年在中洲陪酒、夜夜笙歌背後的苦與甜。

望住中洲河邊開始亮起嘅霓虹燈，聽住班夜場經紀喺度拉客，我不禁心諗：「唔知今晚，又會有幾多個好似浜野はるき咁嘅靚女，喺呢度編織佢地嘅故事呢？」

返到酒店房，第一日嘅行程就咁完結。聽日正式開始自駕出發，早啲瞓啦，巴打。